"Leypsiq"da ciddi itki - 1,5 ay oynamayacaq

"Leypsiq" komandası əsas qapıçısı Peter Qulaçini azı bir ay yarım müddətinə itirib.

90deqiqe.Az xəbər verir ki, bu barədə klubun mətbuat xidməti məlumat yayıb.

Macarıstanlı qolkiper son olaraq Bundesliqada "Volfsburq"ə qarşı keçirilən ev oyununda zədələnib. O, görüşün ilk hissəsində meydanı vaxtından əvvəl tərk edib.

Müayinələr zamanı futbolçunun sol dizinin medial kollateral bağında qopma aşkarlanıb. Müsbət məqam isə odur ki, qapıçıya cərrahi müdaxilə tələb olunmur.

Qulaçi cari mövsümdə 22 rəsmi oyunda iştirak edib və bunların 10-da qapısını toxunulmaz saxlayıb. "Leypsiq" hazırda Almaniya çempionatının turnir cədvəlində 40 xalla beşinci pillədə qərarlaşıb.