"Bayer" səfərdə "Union Berlin"ə məğlub oldu

Almaniya Bundesliqasının 23-cü turunda "Union Berlin" doğma meydanda "Bayer" üzərində minimal hesablı qələbə qazanıb.

90deqiqe.Az-ın məlumata görə, görüş uzun müddət aşağı tempdə keçib. Matçın taleyini isə 28-ci dəqiqədə vurulan qol həll edib. Berlinlilər öz qapıları qarşısındakı künc zərbəsindən sonra sürətli əks-hücum qurublar. Aloşa Kemlyayn hücumu kəskinləşdirib, Robert Andrix kobud səhvə yol verib. Bundan istifadə edən Rani Xedira topu qapıçının üzərindən aşıraraq hesabı açıb – 1:0.

Qonaqlar oyun ərzində daha fəal görünsələr də, səkkiz zərbədən yalnız biri qapı çərçivəsinə düşüb və Leverkuzen təmsilçisi meydanı xalsız tərk edib.

Bu nəticədən sonra “Bayer” altıncı pillədə qalıb. “Union Berlin” isə 10-cu sırada qərarlaşıb.