“Bavariya"dan möhtəşəm geri dönüş

Almaniya Bundesliqasının 31-ci turunda “Maynts” “Bavariya Münhen”i qəbul edib.

90deqiqe.Az-ın məlumatına görə, "MEWA Arena"da keçirilən qarşılaşma qonaqların 4:3 hesablı qələbəsi ilə yekunlaşıb. Matçı Martin Petersen idarə edib.

Ev sahibi komanda matça sürətli başlayıb. 15-ci dəqiqədə Dominik Khor hesabı açıb, 29-cu dəqiqədə Paul Nebel fərqi artırıb. 45+2-ci dəqiqədə Şeraldo Bekker üçüncü qolu vuraraq “Maynts”ı böyük üstünlüyə çıxarıb.

İkinci hissədə “Bavariya” geri dönüşə imza atıb. 53-cü dəqiqədə Nikolya Cekson fərqlənib, 73-cü dəqiqədə Maykl Olise hesab arasındakı fərqi azaldıb. 80-ci dəqiqədə Camal Musiala tarazlığı bərpa edib, 83-cü dəqiqədə isə Harri Keyn qələbə qolunu vurub.

Bu nəticədən sonra “Maynts” 34 xalla turnir cədvəlində 10-cu pillədə qərarlaşıb. “Bavariya” isə 82 xalla liderliyini davam etdirir və daha əvvəl çempionluğu rəsmiləşdirib.

Növbəti turda “Maynts” 3 mayda səfərdə “Sankt-Pauli” ilə qarşılaşacaq, “Bavariya” isə 2 mayda evdə “Haydenhaym”ı qəbul edəcək.