Harri Keyn ilin ən yaxşı hücumçusu seçildi

“Bavariya”nın və İngiltərə millisinin hücumçusu Harri Keyn ilin ən yaxşı hücumçusu adına layiq görülüb.

90deqiqe.Az-ın məlumatına görə, mükafat Londonda, “Palladium” teatrında keçirilən “Qızıl top” mərasimində təqdim olunub.

Keyn 2025/2026 mövsümündə “Bavariya” ilə Almaniya Superkubokunun və Almaniya kubokunun qalibi olub, həmçinin Bundesliqada çempionluq yaşayıb. İngiltərə millisinin heyətində isə 2026-cı il dünya çempionatının bürünc medalını qazanıb.

İngiltərəli forvard 2025-ci ilin avqustundan 2026-cı ilin iyulunadək “Bavariya” və milli komandanın heyətində keçirdiyi 65 oyunda ümumilikdə 73 qol vurub.

Qeyd edək ki, futbol dünyasının ən nüfuzlu fərdi mükafatı tarixində ilk dəfə Fransadan kənarda təqdim olunur. Mərasimin Londonda keçirilməsi 1956-cı ildə ilk “Qızıl top” mükafatının ingiltərəli futbolçu Stenli Metyuza verilməsi ilə əlaqələndirilir.

Tədbir çərçivəsində ötən mövsümün yekunlarına əsasən kişi və qadın futbolunda ilin ən yaxşı oyunçuları, baş məşqçiləri, qapıçıları və klubları da müəyyənləşdirilir.

Xatırladaq ki, “Qızıl top” mükafatı Fransanın “France Football” jurnalı tərəfindən hər il təqdim olunur. Mükafatın sonuncu sahibi PSJ-nin hücumçusu Usman Dembeledir.