Erməni bayrağı açaraq, tribunalarımızı təhrik etdilər - Fatih Terim

"Qarşı tərəfdə daim Ermənistan bayrağı açırsınızsa, tribunalarımızı təhrik edirsiniz. Amma rəqib fanatlar dayanmadan yunan bayrağı, erməni bayrağı açdılar, səs bombaları atdılar".

Corner.az-ın məlumatına görə, bu fikirləri Türkiyənin "Qalatasaray" klubunun baş məşqçisi Fatih Terim Fransada "Marsel"lə qolsuz heç-heçə etdikləri Avropa Liqasının qrup mərhələsinin II tur oyununda yaşananlarla bağlı danışarkən deyib.

68 yaşlı mütəxəssis "sarı-qırmızı"lı fanatların ürəkləri ilə komandaya dəstək olduqlarını və onları tək buraxmadığını sözlərini də əlavə edib: "Bu, asan məsələ deyil. Haqlıdırlar. Böyük kütlənin içərisində ürəkləri ilə bizi yalqız qoymadılar. Qarşı tərəf səs bombaları atırdı. Onlar atdıqları üçün hər halda bizimkilər dayanmayacaqdı. Mən azarkeşlərimizdən sakit olmalarını istədim. Sağ olsunlar, xahişimə əməl etdilər".

Qeyd edək ki, görüş iğtişaşlar səbəbindən 37-ci dəqiqədə dayandırılıb. Hər iki komandanın azarkeşləri müxtəlif pirotexniki vasitələrdən istifadə edərək, bir-birilərinə məşəl atmağa başlayıblar.

Polis müdaxilə edərək fanatları dağıtmaq məqsədi ilə gözyaşardıcı qazdan istifadə edib.