"Bu gün hər şey gözəl sonluqla başa çatdı"

“Futbolçuları, azarkeşləri təbrik edirəm. Daha əvvəl bu şans əlimizdən qaçmışdı. Bu gün hər şey gözəl sonluqla başa çatdı”.

90deqiqe.az xəbər verir ki,  bunu “Qarabağ”ın baş məşqçisi Qurban Qurbanov Bakıda İsveçin "Hakken" komandasına 2:1 hesabı ilə qalib gəldikləri Avropa Liqasının qrup mərhələsinin VI turunun oyunundan sonra mətbuat konfransında deyib.

51 yaşlı mütəxəssis qarşılaşmanın ardından təşkil edilən mətbuat konfransında fikirlərini bölüşüb: “Bu cür uğur əldə etmək Azərbaycan futboluna təkan verəcək. Yaxşı komandaların Bakıya gəlməsi ancaq ölkə futboluna fayda verə bilər. 9 il əvvəl də Bakıda eyni uğura çox yaxın olmuşduq. Həmin matç daha yaxşı formalaşmağımıza kömək oldu. Böyümək üçün bunları soyuqqanlı qəbul etməliyik”.

Təcrübəli baş məşqçi pley-offdakı rəqiblərin güclü olduğunu vurğulayıb: “Həmin matçlara ciddi hazırlaşmaq və layiqli mübarizə aparmaq istəyirik”.