“Qarabağ” artıq futbolçu gətirib, Avropaya yaxşı qiymətə satmalıdır"

"Qarabağ"ın vitse-prezidenti Tahir Gözəl "Linfild"i (Şimali İrlandiya) məğlub etdikləri (2:1) Avropa Liqasının pley-off mərhələsinin cavab matçından sonra jurnalistlərin suallarını cavablandırıb.

Corner.az həmin müsahibəni təqdim edir.

- "Qarabağ" növbəti dəfə Avropa Liqasının qrup mərhələsinə vəsiqə qazandı. Təəssüratlarınız necədir?

- Şimali İrlandiyaya da getmişdim. Orada bizi təriflədilər. Onların qəzətlərində komandamız barədə deyilən sözləri, “Qarabağ”ı nəhəng klub hesab etmələrini oxumaq çox qürurverici idi. Bizi orda gözəl qarşılaşmaları mənə çox xoş təsir bağışladı. Səfərdə çox narahat oldum, üzüldüm, ancaq “Qarabağ”a inanırdım. Məğlubiyyətə layiq olmadığımızı bilirdim. Bu gün də böyük ümidim var idi, həmçinin çox gərgin idim. “Qarabağ” çox üstün və özünəməxsus Avropa oyunu sərgilədi və layiqli qələbə qazandıq. Xalqımızı, “Qarabağ” sevənləri təbrik edirik. Bu axşam biz millət kimi sevindik.

- APOEL-lə oyundakı məğlubiyyət komandada inamsızlıq yaratmışdı?

- Xeyr, inamsızlıq yaratmamışdı. Etiraf edim ki, APOEL-lə Bakıdakı məğlubiyyətdən daha çox Şimali İrlandiyada uduzmağımız mənə təsir etmişdi. Futbol müəmmalıdır, heç nə bilinmir, həyat kimidir, sürprizlərlə doludur. Komandamızın ruh halını saxlamaq və belə davam etmək lazım idi. Bu məğlubiyyətlər bizi daha da gücləndirdi və bu yerə çatdıq.

- Beş dəfə Avropa Liqasının qrupunda iştirak etmisiniz. Bu dəfə qrupda hansı hədəf var?

- Püşkatmada futbol adamları ilə önəmli görüşüm olacaq. Püşkdə bir az bəxt də lazımdır.

- Yəqin ki, qrupda “Mançester Yunayted”lə qarşılaşmaq istəmirsiniz?

- Onları Bakıda görmək də böyük şərəf olar. Ancaq indi deyil, daha sonra (gülür).

- Komanda artıq qrup mərhələsindədir. Güclənməyə ehtiyac var? Transferlər gözlənilir?

- Avropadakı uğurumuz klubun büdcəsinə çox kömək edir. Ancaq mənimlə razılaşarsınız ki, aldığımız yeni futbolçular effektli oldu. Hər oyun arzum budur ki, “Qarabağ” daha yüksək səviyyədə çıxış etsin.

- Fransa “Genqam”ı Abdullah Zubir üçün bir milyon avro ödəmək istəyir. Onu satmaq fikriniz var? Zubiri bu qiymətə satsanız, sizə xeyri olar?

- Heç bir fikrimiz yoxdur. Kimisə satmaq istəmirik. Bizim güclü olmağa ehtiyacımız var. Var gücümüzlə davam edəcəyik. O vəziyyətdə deyilik ki, oyunçumuzu sataq. “Qarabağ” artıq futbolçu gətirib, Avropaya yaxşı qiymətə satmalıdır. Əslində, bunu danışmaq üçün Monakoya gedəcəm. “Qarabağ”ı Avropada daha inkişaf etmiş bir klub edə biləcəyik. Bu, məni həyəcanlandırır.

- Qrup oyunları Olimpiya stadionunda olacaq, yoxsa Tofiq Bəhramov adına Respublika stadionunda? Azarkeşlər BOS-a getməyə çətinlik çəkir.

- Sizinlə razıyam. Baxacağıq. Böyük klublar olsa, bizə 70 min azarkeş lazımdır, nəinki 30 min. Görək, nə baş verir. Hələlik, bizim üçün bura daha yaxşıdır.

- Qrupda minimum hədəf nədir?

- Rekord vurmaq, mərhələ keçmək! Tarixdə belə güclü “Qarabağ” olmayıb. Biz buna layiq idik və buna hazırlaşmışıq. Görün, neçə ildir Qurban Qurbanovklubdadır. Etiraf edim ki, çatışmayan cəhət var. Oyunlar o qədər gərgin keçir ki, yerli futbolçularımıza çox şans verə bilmirik. Bundan narahatam. Arzu edərdim ki, Rahil Məmmədovdan başqa üç-dörd yerli uşaq da oynasın. O qədər gərgin oyunlar var ki... Ya hədəfə getməliyik, ya da futbolçularımıza şans verməliyik. Hədəfə gedəndə sevinirəm. Ancaq kluba baxanda öz oyunçularımızı görmürəm. Bu yolla nə qədər getsək, axırı olmayacaq. Səmimi düşüncələrimi sizinlə bölüşürəm. Mesaj vermirəm. Yerli futbolçunun az olması məni narahat edir.(report)