"Qarabağ"ın qapıçısı çox ucaboydur, qol olacağını bilmirdim"

“Komanda ilə birgə gördüyüm işi davam etdirirəm. Üzərimdə çalışıb komanda üçün daha yaxşısını edəcəm. Son dəqiqələrdəki mübarizəni xüsusilə vurğulaya bilərəm. Yekunda bunun bəhrəsini gördük”.

Corner.az-ın məlumatına görə, bu sözləri “Sevilya”nın futbolçusu Munir Əl-Haddadi Avropa Liqasının qrup mərhələsinin 1-ci turunda “Qarabağ”a 3:0 hesabı ilə qalib gəldikləri matçdan sonra klubun saytına deyib.

O, Ağdam klubu ilə görüşdə fərqləndiyi epizodu belə şərh edib: “Rəqibin qapıçısı çox ucaboydur. Zərbənin qol olub-olmayacağını bilmirdim. Sonda aşırma zərbəsi vurmağı qərar verdim və fərqlənməyi bacardım. Müdafiəçilərimiz mükəmməl oynadılar. Biz məşqdə buna hazırlaşırdıq. Komandamız oyundan-oyuna daha yaxşı nəticələr göstərir. Bu görüşü unudub bazar günü “Real”a qarşı olan matç barədə düşünməliyik”.

24 yaşlı hücumçu “Sevilya”nın qrup mərhələsinin ilk oyununda qalib gəlməsinin vacib olduğunu söyləyib: “Əlbəttə, ilk oyunda qələbə qazanmaq komandaya stimul verir. Amma dediyim kimi, biz indi “Real”la oyun barəsində düşünməliyik. Evdə azarkeşlərimizə layiq olduqları qələbəni bəxş etmək istəyirik”.