“Beşiktaş”dan Avropa Liqasında inamlı qələbə

UEFA Avropa Liqasının pley-off mərhələsinin ilk oyununda Türkiyənin “Beşiktaş” klubu doğma meydanda Litvanın “Kauno Jalgiris” komandasını qəbul edib.

90deqiqe.Az-ın məlumatına görə, İstanbul təmsilçisi azarkeşlərini sevindirərək rəqibini 3:0 hesabı ilə məğlub edib.

“Beşiktaş” hesabı artıq 6-cı dəqiqədə açıb. Rıdvan Yılmazın ötürməsindən sonra Oh Hyon-kyu fərqlənib. Bir qədər sonra Amir Murillo meydan sahiblərinin üstünlüyünü iki topa çatdırıb.

Qarşılaşmada son nöqtəni 60-cı dəqiqədə Orkun Kökçü qoyub. Türkiyə millisinin üzvü penaltini dəqiq yerinə yetirərək komandasının üçüncü qolunu vurub.

Günün digər oyununda Rumıniyanın “Universitatya” (Krayova) klubu Ermənistanın “Ararat-Armeniya” komandası ilə üz-üzə gəlib. Qarşılaşma 1:1 hesablı heç-heçə ilə başa çatıb.

Meydan sahiblərinin heyətində Nikuşor Banku, qonaqlarda isə Aleksandros Malis fərqlənib.

Komandalar arasında cavab oyunları 27 avqustda keçiriləcək.