“Yunion” “Real Sosyedad”la heç-heçə etdi

Avropa Liqasında Belçikanın “Yunion Sent-Jillua” və İspaniyanın “Real Sosyedad” komandaları üz-üzə gəlib.

90deqiqe.Az-ın məlumatına görə, qarşılaşma 1:1 hesabı ilə başa çatıb.

İlk hissədə komandalar fərqlənə bilməyiblər. Fasilədən sonra isə qonaqlar hesabı açıblar. Görüşün 46-cı dəqiqəsində Benyat Turrientes rəqib qapısına yol taparaq “Real Sosyedad”ı önə çıxarıb.

Üstünlüyünü qorumağa çalışan İspaniya təmsilçisi meydan sahiblərinin hücumlarına qarşı mübarizə aparıb. Lakin “Yunion”un səyləri matçın sonlarına yaxın nəticə verib. 88-ci dəqiqədə Seku Keyta qol vuraraq hesabı bərabərləşdirib və komandasına bir xal qazandırıb.

Qalan dəqiqələrdə hesab dəyişməyib və tərəflər xalları bölüşüblər.

Qeyd edək ki, “Real Sosyedad”ın rusiyalı yarımmüdafiəçisi Arsen Zaxaryan qarşılaşmanı ehtiyat oyunçular skamyasında keçirib və meydana çıxmayıb.