Ronaldo'dan AÇ-2020-yə vida: Biz daha güclü qayıdacağıq

Portuqaliya milli komandasının futbolçusu Kriştiano Ronaldo AÇ-2020-yə vida etmələri ilə bağlı fikirlərini bildirib.

Corner.az xəbər verir ki, bu haqda, 36 yaşlı hücumçu “feysbuk” hesabında paylaşım edib:

“İstədiyimiz nəticəni əldə edə bilmədik və yarışı tez tərk etdik. Ancaq keçdiyimiz yolla qürur duyuruq. Avropa çempionu adını yeniləmək üçün hər şey etdik, lakin olmadı.

Azarkeşlərimiz komandanı yorulmadan dəstəkləməyə çalışdılar. Bizə göstərdikləri etimadı doğrultmaq üçün mübarizə apardıq. Hamımızın istədiyi yerə çatmaq mümkün olmadı.

Yarışda qalan komandalara uğurlar arzu edirəm. Biz daha güclü qayıdacağıq. Yaşasın Portuqaliya!”