AVRO-2024-ün seçmə mərhələsində Azərbaycan millisi ilə eyni qrupda yer alan Avstriya yığmasının kapitanı David Alabanın durumuna aydınlıq gəlib. Corner.az xəbər verir ki, ulduz futbolçunun klubu “Real” onun zədəsinin vəziyyəti ilə bağlı bəyanat yayıb.
Bildirilib ki, Çempionlar Liqasının 1/8 final mərhələsində “Liverpul”la qarşılaşmada zədələnərək əvəzlənən 31 yaşlı sol cinah müdafiəçisinin sağ bud əzələsində yırtıq aşkarlanıb. Madrid klubu onun bir ay yaşıl meydanlardan uzaq qalacağını diqqətə çatdırıb.
Avstriya ilə Azərbaycan arasında görüşün martın 24-də baş tutacağını nəzərə alsaq, Alabanın millimizlə görüşü də buraxması gözlənilir.
