"AVRO-2024-ün seçmə mərhələsində Azərbaycan millisi ilə eyni qrupda yer alan Avstriya yığmasının hədəfi final mərhələsində iştirak etməkdi". Corner.az xəbər verir ki, bunu Avstriya yığmasının baş məşqçisi Ralf Ranqnik deyib.
65 yaşlı çalışdırıcı yerli mətbuata açıqlamasında buna yüz faiz inandıqlarını söyləyib:
“Avropa çempionatına vəsiqə qazanacağımıza yüz faiz əminəm. Çünki əla komandamız var. Azərbaycan (4:1) və Estoniyaya (2:1) qarşı keçirdiyimiz ilk oyunlar da bunun göstəricisi idi. Oyundan-oyuna daha yaxşı performans ortaya qoyuruq. Fikrimcə, bu heyət daha yaxşısına qadirdi. Hələ bu komandanı qəbul edəndə böyük işlər görəcəyimizi düşünürdüm. Yenə fikrimdə qalıram. İlk məqsəd final mərhələsinə adlamaqdır. Bunu bacaracağımıza şübhəm yoxdu”.
Qeyd edək ki, Avstriya F qrupunda növbəti oyununu iyunun 17-də səfərdə Belçikaya qarşı keçirəcək. Millimiz isə həmin gün Estoniyanı qəbul edəcək.