Kaşukdan ilk qol, Ağayevdən 5 sarı vərəqə

21 yaşadək futbolçulardan ibarət milli komandalar arasında Avropa çempionatının oyunları start götürüb. 90deqiqe.az xəbər verir ki, Gürcüstanda təşkil olunan turnirin hakimləri arasında həmyerlilərimiz də var.  

Belə ki, FİFA referisi Əliyar Ağayev və laynsmanlar Zeynal Zeynalovla Akif Əmirəli yarışın açılış oyununu idarə ediblər. Onlar Tbilisidəki Mesxi stadionunda Belçika və Niderland yığmaları arasındakı görüşdə iş başında olublar.

Qolsuz bərabərliklə yekunlaşan qarşılaşmada Ağayev Belçikanın 3, Niderlandın 2 futbolçusuna sarı vərəqə göstərib.  

Ötən mövsümü icarə əsasında “Sabah”da keçirən Aleksey Kaşukun formasını geyindiyi Ukrayna yığması isə Xorvatiyanı məğlub edib  2:0. Görüşdə hesabı 19-cu dəqiqədə Kaşuk açıb və bu, çempionatının ilk qolu olub.

Qeyd edək ki, Gürcüstan və Rumıniyanın birlikdə təşkil etdiyi U-21 Avropa çempionatının final oyunu iyulun 8-də olacaq