Matteus kobud səhvə yol verən Noyerə dəstək oldu

"Bavariya"nın keçmiş futbolçusu Lotar Matteus Almaniya yığmasının qapıçısı Manuel Noyerin ünvanına gələn tənqidlərlə bağlı açıqlama verib.

90deqiqe.Az xəbər verir ki, 63 yaşlı sabiq futbolçu alman qolkiperə qarşı edilən tənqidlərin doğru olmadığını bildirib.

“Bu, bizə heç də kömək etməyəcək. Noyeri Madriddə və ya Yunanıstanla oyunda etdiyi səhvə görə tənqid edə bilərsiniz, ancaq yunanlara qarşı etdiyi seyvlərə görə də tərifləyə bilərsiniz. Biz almanlar mənfi hekayələrə çox baxırıq. Mən də Noyeri tənqid etdim, amma hər şey ölçülü olmalıdır.

Əgər Avropa çempionatını uğurla keçirmək istəyiriksə, ekspertlər və jurnalistlər kimi bizim də komandaya dəstək olmaq öhdəliyimiz var. Mən bunu başqa ölkələrdən bilirəm. Böyük başlıqlara baxmayaraq, komanda oyun zamanı dəstəklənir.

Julian Naqelsmann 14 ildən artıqdır ki, bizi ruhlandıran və bir çox uğurlara töhfə verən Noyeri seçib. Hamımız səhv edirik”, - Matteus deyib. 

2024-cü il futbol üzrə Avropa çempionatı cümə günü, iyunun 14-də başlayır. Almaniya millisi turnirdə səfərinə A qrupundan başlayacaq, burada rəqibləri Şotlandiya, Macarıstan və İsveçrə milliləri olacaq.

Yunanıstan millisi ilə son yoldaşlıq görüşündə (2:1) Noyerin səhvindən sonra rəqib hesabı açıb.