"Yaxşı komandamız var, amma... "

Ukrayna millisinin müdafiəçisi Aleksandr Zinçenko 2024-cü il Avropa çempionatında millidən böyük gözləntilərdən danışıb.

90deqiqe.Az xəbər verir ki, "Arsenal"da çıxış edən 27 yaşlı oyunçu bu barədə UEFA-nın rəsmi saytına açıqlamasında bildirib.

“Bir çoxları bizdən yaxşı nəticələr gözləyir. Yaxşı komandamız var, amma yüksək səslə çıxış etməyi sevmirəm. Meydanda hər şeyi sübut etməliyik. Həmişə təzyiq var, amma indi bir qədər yüksək səviyyədədir. Amma ümid edirəm ki, hər birimiz əlimizdən gələni edəcəyik və bu, hər bir azarkeşə görünəcək.

Yenə deyirəm, bizim çox yaxşı komandamız var və həm fərdi, həm də komanda şəklində inkişaf etmək və böyümək üçün hər şeyimiz var. Bizdə çox gözəl atmosfer var, bu məşqçilər korpusu ilə işləmək xoşdur. Ona görə də daha böyük uğurlar qazana bilməməyimiz üçün heç bir səbəb görmürəm. Amma bunun üçün çox çalışmalı, mümkün qədər yaxşı hazırlaşmalıyıq və sonra bunun nə olacağını görəcəyik

Ukrayna millisi Belçika, Rumıniya və Slovakiya ilə eyni qrupda çıxış edəcək. İlk oyun iyunun 17-də baş tutacaq. Ukrayna millisi Rumıniya ilə qarşılaşacaq. İyunun 21-də Ukrayna millisi Slovakiya ilə, iyunun 26-da isə Belçika ilə qarşılaşacaq.