Uels yığmasında daha bir itki: Millimizlə oyunu buraxacaq

AVRO-2020-nin seçmə mərhələsində Azərbaycan millisi ilə eyni qrupda yer alan Uels yığması daha bir futbolçusunu itirib.

Corner.az-ın yerli mətbuata istinadən məlumatına görə, bu dəfə yarımmüdafiəçi Conni Uilyams sıradan çıxıb.

"Çarlton"un futbolçusu "Derbi" üzərində 3:0 hesablı qələbə qazandıqları çempionat oyununda xəsarət alaraq, ilk hissədə əvəzlənib. Tibbi müayinədən sonra 26 yaşlı oyunçunun dizindən əməliyyat olunmasına qərar verilib.

Həkimlər onun ən azı 2 ay yaşıl meydanlardan uzaq qalacağını açıqlayıb. Bu isə o deməkdi ki, Uilyams seçmə mərhələnin Azərbaycan və Macarıstanla son matçlarında iştirak etməyəcək.

Qeyd edək ki, noyabrın 16-da Bakıda millimizin qonağı olacaq Uels bundan üç gün sonra Kardiffdə Macarıstanı qəbul edəcək.(matc)