Lion'un baş məşqçisindən məğlubiyyət şərhi

"Lion"un baş məşqçisi Rudi Qarsiya Çempionlar Liqasının yarımfinalında "Bavariya"ya 0:3 hesablı məğlubiyyəti şərh edib.

Corner.az UEFA-nın saytına istinadən xəbər verir ki, o, oyunla bağlı deyib: "İlk qolu biz vurmalı idik, amma Qnabrinin mükəmməl oyunu sayəsində rəqib hesabda önə keçdi. İkinci hissədə təslim olmasaq da, baş verənlərin ədalətsiz olduğunu düşündük".

56 yaşlı mütəxəssis fasilədən sonra daha yaxşı oynadıqlarını bildirib: "İkinci hissədə boşluqları bağlamaq mümkün oldu, ancaq qapıçı Noyer onları xilas etdi. "Bavariya" üçün bizimlə görüş o qədər də asan deyildi. Düşünürəm ki, onlar açıq-aşkar favorit sayılsa da, bizi məğlub etməkdən məmnundurlar".(qol)