Ronaldo Messini rəqib olaraq görmədiyini söylədi

 "Yuventus"un futbolçusu Kriştiano Ronaldo  "Barselona"nın hücumçusu Lionel Messi ilə münasibətlərindən danışıb.

Corner.az "Football Italia"ya istinadən xəbər verir ki, 35 yaşlı hücumçu Kataloniya komandasına səfərdə 3:0 hesabı ilə qalib gəldikləri Çempionlar Liqasının qrup mərhələsinin 6-cı  tur matçından sonra maraqlı açıqlama verib.

Portuqaliyalı futbolçu argentinalı hücumçunu özünə rəqib hesab etmədiyini bildirib: "12-13 ildir ki, birlikdə müxtəlif mükafatlandırma mərasimlərində iştirak edirik. Onu heç vaxt rəqib kimi görməmişəm. Hər şey media tərəfindən şişirdilir. Biz həmişə yaxşı münasibətdə olmuşuq. Messidən soruşsanız, o da sizə bunları söyləyəcək".

Qeyd edək ki, "Yuventus" "Barselona" üzərində qələbə sayəsində qrup lideri kimi 1/8 finala yüksəlib.