Azərbaycanlı futbolçu həm ÇL-da həm də Beşiktaş'da debüt etdi - 18 yaşında

Türkiyə çempionu “Beşiktaş” UEFA Çempionlar Liqasının qrup mərhələsinin ikinci turu çərçivəsində səfərdə “Ayaks”ın qonağı olub.

Corner.az xəbər verir ki, Niderland təmsilçisinin 2:0 hesablı qələbəsiylə bitən bu görüş “qara qartallar”ın gənc futbolçusu Berkay Vardar üçün əlamətdar olub.

Belə ki, 18 yaşlı yarımmüdafiəçi ilk dəfə İstanbul təmsilçisinin əsas komandasında rəsmi oyuna çıxıb. Baş məşqçi Sərgən Yalçın onu matçın 73-cü dəqiqəsində Umut Meraşın əvəzində meydana buraxıb. Bununla da gənc futbolçu, “Beşiktaş”ın əsas komandasında rəsmən debüt edib.

Berkay “Beşiktaş”ın öz yetirməsidir. Azərbaycanda dünyaya gəlmiş futbolçu  U-17 yığmamızın da uğurları üçün çalışıb və hazırda Azərbaycanın U-19 millisinə dəvət alır.

Xatırladaq ki, “Beşiktaş” “Ayaks”la səfər oyununa 11 əskiklə yollanıb. Bu üzdən də məşqçilər heyəti əsas komandaya bir neçə gənc futbolçu cəlb etmişdi ki, onlardan da biri Berkay idi.

İlk turda doğma meydanda “Borussiya”ya (Dortmund, Almaniya) 1:2 hesabıyla uduzmuş “Beşiktaş” iki turdan sonra xalsız və sonuncudur.