“Möhtəşəm oyuna görə “Manchester City”ni təbrik edirəm, amma…” – Pochettino

Çempionlar Liqasının 1/4  final mərhələsinin cavab oyunları çərçivəsində səfərdə “Manchester City”yə 3:4 hesabı ilə uduzsa da, mərhələni adlayan “Tottanhem”in baş məşqçisi Mauricio Pochettino matçdan sonra açıqlama verib.

Corner.az İngiltərə mətbuatına istinadən xəbər verir ki, 47 yaşlı  mütəxəssis, komandasının göstərdiyi oyuna və növbəti mərhələyə vəsiqə qazandığına görə xoşbəxt olduğunu deyib: “Bu, inanılmazdır. Çox xoşbəxtəm.Onlarla qürur duyuram. Onlar meydanda mükəmməl xarakter göstərdilər. Möhtəşəm oyuna görə “Manchester City”ni təbrik edirəm, amma düşünürəm ki, biz daha çox mübarizə apardıq”.

Argentinalı baş məşqçi, rəqibin futbolçusu Rahim Sterlinqin ləğv olunan qolu ilə bağlı da fikirlərini bölüşüb: “Sterlingin qolundan sonra beynimdən çox fikir keçdi. Böyük təəssüf hissi yaşayırdıq, amma qərar dəyişdi. Futbolu buna görə sevirik”.