Futbol üzrə UEFA Çempionlar Liqasında ilkin mərhələyə yekun vurulub. Corner.az xəbər verir ki, bu mərhələnin həlledici oyununda Andorra çempionu “İnter”lə İslandiyanın “Vikinqur” komandaları üz-üzə gəlib.
Görüşdə minimal hesabla qalib gələn İslandiya çempionu ÇL-in 1-ci təsnifat mərhələsinə vəsiqə qazanıb. “Vikinqur”u növbəti mərhələdə İsveç çempionu “Malmö” ilə oyunlar gözləyir.
Xatırladaq ki, “Vikinqur” ilkin mərhələnin yarımfinalında Estoniya çempionu “Levadiya”nı 6:1, “İnter” isə San Marinonun “La Fiorita” komandasını 2:1 məğlub edərək finala yüksəlmişdilər.
ÇL-in ilkin təsnifat mərhələsinin həm yarımfinalında, həm də finalında uduzan komandalar mübarizəni Konfrans Liqasının 2-ci təsnifat mərhələsində davam etdirəcəklər. Finalda uduzan “İnter”i ÇL-in 1-ci təsnifat mərhələsinin “Pünik” (Ermənistan) - ÇFR Kluj (Rumıniya) cütünün məğlubu ilə duel gözləyir. “La Fiorita” ÇL-in təsnifat mərhələsinin “Ballkani” (Kosovo) - “Jalgiris” (Litva) cütünün məğlubu ilə qarşılaşacaq. “Levadiya” da “Şemrok Rovers” (İrlandiya) - “Hibernians” (Malta) cütünün məğlubunu gözləyir.
Çempionlar Liqası
İlkin mərhələ, final
24 iyun
İnter (Andorra) – Vikinqur (İslandiya) 0:1
Qol: İnqason, 68.
