"Qarabağ”ın UEFA Çempionlar Liqasının 1-ci təsnifat mərhələsindəki rəqibi olan Polşa çempionu “Lex” bu gün daha bir yoxlama oyununa çıxıb. Corner.az xəbər verir ki, Poznan təmsilçisi Polşa çempionatının digər təmsilçisi “Yagelloniya” ilə üz-üzə gəlib.
Üç qolun qeydə alındığı bu matçda “Qarabağ”ın rəqibi əzmkar qələbə qazanıb. 18-ci dəqiqədə məğlub duruma düşən “Lex”, 49 və 57-ci dəqiqələrdə xorvatiyalı müdafiəçisi Antonio Miliçin dublu sayəsində qələbə qazanıb.
Bu matç media və azarkeşlər üçün qapalı olub. Bununla da “Lex” “Qarabağ”la oyundan öncəki təlim-məşq toplanışını qələbə ilə yekunlaşıdırb. Xatırladaq ki, Poznan təmsilçisi bundan əvvəlki yoxlama oyunlarında "Vidzev"ə 1:2, "Poqon"a isə 0:1 hesabı ilə uduzmuşdu.
“Qarabağ” "Lex"lə iyulun 5-də səfərdə qarşılaşacaq. Bu komandalar arasındakı cavab görüşü isə bir həftə sonra Bakıda olacaq.
