Mahir Emreli Şkupi ilə cavab matçını da buraxacaq

Xorvatiyanın "Dinamo" (Zaqreb) klubunun futbolçusu Mahir Emreli Şimali Makedoniyada "Şkupi"yə qarşı keçirəcəkləri UEFA Çempionlar Liqasının II təsnifat mərhələsinin cavab oyununda da iştirak etməyəcək.

Corner.az-ın məlumata görə, buna səbəb  25 yaşlı hücumçunun əzələ zədəsini yenicə sağaltması olub.

Bərpa prosesini keçən millimizin üzvü iyulun 25-dən meydanda məşqlərə başlayacaq.

Qeyd edək ki, iyulun 26-da oynanılacaq "Şkupi" - "Dinamo" qarşılaşması Bakı vaxtı ilə saat 23:00-da start götürəcək. Zaqrebdəki ilk matçda qalib müəyyənləşməyib - 2:2. Emreli zədə ucbatından bu görüşdə də iştirak etməyib.

Hücumçu çempionatın I turunda "Lokomotiv"ə 3:2, II turda "Slaven Belupo"ya 5:1 hesabı ilə qalib gəldikləri oyunları da buraxmalı olub.