- Çempionlar liqası
- 12:48 23.10.2024
Azərbaycan çempionu “Qarabağ” bu gün UEFA Çempionlar Liqasının 2-ci təsnifat mərhələsində cavab oyununu keçirib. Corner.az xəbər verir ki, Ağdam klubu İsveçrədə “Sürix”in qonağı olub.
Bir həftə əvvəl Bakıda keçirilən oyunda Qurban Qurbanovun rəhbərlik etdiyi komanda rəqibinə 3:2 hesabı ilə qalib gəlmişdi. “Qarabağ” İsveçrəyə hesab üstünlüyü ilə getsə də, “Sürix”in mərhələ keçmək üçün bütün gücünü ortaya qoyacağına şübhə yox idi.
Cavab oyununda hesabı meydan sahibləri açsalar da erkən qola görə ruhdan düşməyən “köhlən atlar” fasilədən sonra hesabı bərabərləşdirib. Matçın əsas vaxtına əlavə olunmuş dəqiqələrdə “Sürix” yenidən fərqlənib. Bu səbəbdən ümumi hesab bərabərləşdiyinə görə əlavə vaxta ehtiyac duyulub. Əlavə vaxtın ilk yarısında “Qarabağ” ikinci qolu vurmaqla ümumi nəticəni xeyrinə dəyişib. Beləliklə, komandamız növbəti mərhələyə adlayıb.
UEFA Çempionlar Liqası
2-ci təsnifat mərhələsinin cavab oyunu
27 iyul
Sürix – Qarabağ 2:2
Qol: M.Medvedev, 4-öz qapısına. İ.Santini, 90+6 – K.Borges, 56. K.Ovusu, 98.
Hakimlər: Allard Lindhout, Çarlz Sxap, Roy De Nas, Jerön Mansxot (hamısı Niderland).
İsveçrə. “Letsiqrund” stadionu.