Qarabağ'la oyunda hər şey öz əlimizdədir

"Əlbəttə, "Qarabağ" çətin rəqibdir. 2 il əvvəl "Qarabağ" haqqında bir az məlumat öyrənmişdim".

Corner.az xəbər verir ki, bunu UEFA Çempionlar Liqasının III təsnifat mərhələsində "Qarabağ"ın rəqibi olan Macarıstanın "Ferentsvaroş" klubunun norveçli futbolçusu Kristoffer Sakariassen deyib.

Oyunun sonuna əlavə edilmiş dəqiqələrdə "Puşkaş Akademiyası"na vurduğu qolla "Ferentsvaroş"a Macarıstan çempionatının ilk turunda qələbə qazandıran 28 yaşlı yarımmüdafiəçi klub televiziyasına müsahibəsində avsustun 3-də Bakıda "Qarabağ"a qarşı keçirəcəkləri oyundan da söz açıb:

"Güclü rəqibə qarşı mövsümün ilk turunda qalib gəldik. Hazırda biz hər iki yarışda yaxşı yerdəyik. Hamı "Qarabağ"la oyuna hazırdır. Bilirik ki, çətin oyun olacaq. Ancaq hər şey bizim öz əlimizdədir. Əgər oyunçular yaxşı formada olsa, bizim qələbə qazanmaq üçün şansımız olacaq".

Qeyd edək ki, "Qarabağ" "Ferentsvaroş"la ilk oyununu avqustun 3-də Bakıda, cavab matçını avqustun 9-da Budapeştdə keçirəcək.