Finlandiyanın paytaxtı Helsinkidə UEFA Super Kuboku uğrunda oyun keçirilib. Corner.az xəbər verir ki, həlledici matçda “Real” (İspaniya) və “Ayntraxt” (Almaniya) komandaları üz-üzə gəlib.
Madrid klubu UEFA Çempionlar Liqasının, Frankfurt təmsilçisi isə Avropa Liqasının son qalibi kimi Super Kubok matçında oynamaq hüququ əldə etmişdi. Bu komandalar 62 ildən sonra yenidən avrokubokların finalında qarşılaşıb. İspaniya və Almaniya təmsilçiləri daha əvvəl 1959/1960 mövsümündə UEFA Çempionlar Kubokunun həlledici oyununda bir-birinə rəqib olmuşdu. Həmin matçda 7:3 hesablı qələbə qazanan Madrid klubu ardıcıl 5-ci dəfə titula sahib çıxmışdı. Buna kimi 7 dəfə Super Kubok matçına çıxmış “Real” bunların 4-də bu kubokun sahibi olmuşdu. “Ayntraxt” isə ilk dəfə Super Kubok oyununda iştirak edirdi.
Qarşılaşmaya gəlincə 2 qol qeydə alınıb. “Hər hissədə bir dəfə fərqlənən “Real” rəqibi üzərində inamlı qələbə qazanıb. İlk yarıda David Alaba, ikinci hissədə isə Kərim Benzema rəqib qapısına yol tapıb.
Xatırladaq ki, indiyədək bu titula ən çox “Barselona” ilə “Milan” yiyələnmişdi. Hər iki komanda 5 dəfə Super Kubok qazanmışdı. Bugünkü zəfəri sayəsində “Real” da zirvəyə şərik çıxıb.
UEFA Super Kuboku
10 avqust
Real – Ayntraxt 2:0
Qol: Alaba, 37. Benzema, 65.
Baş hakim: Maykl Oliver.
Helsinki. Olimpiya Stadionu.
