Çempionlar Liqasının 1/4 final mərhələsinin “Mançester Siti” ilə cavab oyunu “Bavariya”nın futbolçusu Jozua Kimmix üçün əlamətdar olub. Corner.az xəbər verir ki, 28 yaşlı yarımmüdafiəçi 1:1 hesabı ilə başa çatan qarşılaşmanın 83-cü dəqiqəsində penaltidən fərqlənərək, komandasını məğlubiyyətdən xilas etməyi bacarıb.
Alman oyunçu, bununla “Bavariya”dakı karyerasında ilk dəfə penaltidən qol vurub. O, buna qədər sonuncu dəfə 8 il əvvəl penaltidən yararlanıb.
Maraqlıdı ki, bu məhz Almaniyanın U-21 yığmasının heyətində Azərbaycan millisinə qarşı görüşə təsadüf edib. 2015-ci il sentyabrın 8-də Bakıda baş tutan qarşılaşmada Kimmix komandasının ikinci qoluna penaltidən imza atıb. Həmin matçda qonaqlar 3:0 hesablı qələbəyə sevinib.
Qeyd edək ki, ilk oyunda “Mançester Siti”yə 0:3 hesabı ilə məğlub olan “Bavariya” Çempionlar Liqası ilə vidalaşıb.