“Biz daha yaxşı komandayıq, amma layiqli məğlub olduq”

“Qarabağ” futbol klubunun baş məşqçisi Qurban Qurbanov UEFA Çempionlar Liqasının qrup mərhələsində “Liverpul”a qarşı keçirilən oyundan sonra mətbuat konfransında fikirlərini bölüşüb.

90deqiqe.Az-ın məlumata görə, təcrübəli mütəxəssis bildirib ki, komandası daha yaxşı çıxış edə bilərdi:

“Daha yaxşı oynaya bilərdik, bu bizim oyunumuz deyildi. Biz daha yaxşı komandayıq, baxmayaraq ki, “Liverpul”a qarşı oynayırdıq. Hər bir halda layiqli məğlub olduq, amma layiqli şəkildə də ilk 24-lükdə yer aldıq. Xalqımızı təbrik edirəm. Hamı bu mərhələyə yüksəlməyimizi çox gözləyirdi”.

Qurban Qurbanov turnirin bu mərhələsində oyunların daha da çətinləşdiyini, rəqiblərin səviyyəsinin yüksəldiyini vurğulayıb. O qeyd edib ki, komandada həm böyükhesablı məğlubiyyətin məyusluğu, həm də pley-offa yüksəlməyin sevinci var:

“Daha yaxşı mübarizə apara bilərdik. İlk səkkiz komanda arasında rahat rəqib yox idi. Hər oyun, hər stadion öz çətinliyi ilə seçilirdi”.

Qeyd edək ki, “Enfild” stadionunda baş tutan qarşılaşma “Liverpul”un 6:0 hesablı qələbəsi ilə yekunlaşıb. Bununla belə, turnir cədvəlini 10 xalla 22-ci pillədə tamamlayan “Qarabağ” növbəti mərhələyə vəsiqə qazanıb.Beləliklə, “köhlən atlar” Çempionlar Liqasının pley-off mərhələsinə yüksələn ilk Azərbaycan klubu kimi tarixə düşüb.