UEFA Pedro Netu ilə bağlı qərarını açıqladı

UEFA “Çelsi”nin hücumçusu Pedro Netu ilə bağlı başladılan intizam araşdırmasının nəticəsini açıqlayıb.

90deqiqe.Az xəbər verir ki, UEFA bütün faktları araşdırdıqdan sonra oyunçuya xəbərdarlıq edilməsini qərara alıb. Bu qərar Netunun Çempionlar Liqasında cavab görüşündə iştirak etməsinə imkan yaradır.

Lakin hücumçu daxili yarışlarda başqa qayda pozuntusuna görə bir oyunluq cəza alıb.

Portuqaliya millisinin üzvü Çempionlar Liqasının “PSJ” ilə oyununda baş verən insidentə görə cəzalandırıla bilərdi. Qarşılaşmanın sonlarında Netu topdaşıyan uşağı itələmişdi. Matç Paris təmsilçisinin 5:2 hesablı səfər qələbəsi ilə başa çatmışdı.

Hadisədən sonra futbolçu davranışına görə üzr istəmişdi.