Kilian Mbappe geri döndü

Madrid “Real”ının hücumçusu Kilian Mbappe Çempionlar Liqasının 1/8 final mərhələsində “Mançester Siti”yə qarşı oyunda meydana çıxıb.

90deqiqe.Az-ın məlumatına görə, fransalı futbolçu qarşılaşmanın 69-cu dəqiqəsində əvəzetmə ilə oyuna daxil olub və Brahim Diası əvəzləyib. Bu, 27 yaşlı forvardın təxminən bir aylıq fasilədən sonra ilk oyunu olub. O, diz zədəsi səbəbindən əvvəlki beş matçı, o cümlədən “şəhərlilər”lə ilk qarşılaşmanı buraxmışdı.

Mbappe meydana daxil olan anda hesab 1:1 olub. İki oyunun ümumi nəticəsinə görə isə Madrid təmsilçisi 4:1 hesabı ilə üstün vəziyyətdə idi.

Qeyd edək ki, “kral klubu”nun hücum xəttinin lideri cari mövsüm Çempionlar Liqasında vurduğu 13 qolla bombardirlər siyahısına başçılıq edir.