“Sabah” tarixində ilk dəfə Çempionlar Liqasının əsas mərhələsində!

“Sabah” klubu Azərbaycan futbolu adına tarixi uğura imza atıb.

90deqiqe.Az-ın məlumatına görə, ölkə çempionu UEFA Çempionlar Liqasının pley-off mərhələsinin cavab oyununda İsrailin “Hapoel” (Beer-Şeva) komandasını məğlub edərək turnirin əsas mərhələsinə vəsiqə qazanıb.

Tofiq Bəhramov adına Respublika stadionunda keçirilən qarşılaşmanın əsas vaxtında “Sabah” 3:2 hesabı ilə qalib gəlib. Azərbaycan təmsilçisinin qollarını Kristian Nvaçukvu, Umarali Raxmonaliyev və 90+4-cü dəqiqədə Tellur Mütəllimov vurublar. Qonaq komandanın heyətində isə İqor Zlatanoviç və Qay Mizrahi fərqləniblər.

Rumıniyada keçirilən ilk görüşdə “Hapoel” 2:1 hesabı ilə qalib gəldiyindən cütün taleyi əlavə vaxta daşınıb.

Əlavə vaxtda isə “Sabah” üstünlüyü ələ alıb. 101-ci dəqiqədə Patrik Orfe Mbina, 115-ci dəqiqədə isə Coy-Lens Mikels rəqib qapısına yol taparaq Azərbaycan çempionunun qələbəsini rəsmiləşdiriblər.

Beləliklə, iki oyunun nəticəsinə əsasən 6:4 hesabı ilə üstün olan “Sabah” tarixində ilk dəfə UEFA Çempionlar Liqasının əsas mərhələsində mübarizə aparacaq.

Bu, Azərbaycan klub futbolu üçün də əlamətdar nailiyyətlərdən biridir.