“Mbappeyə qarşı oynamağa hazırıq”

“İnter”in kapitanı Lautaro Martines UEFA Çempionlar Liqasının əsas mərhələsinin I turunda “Real Madrid”ə qarşı keçirəcəkləri oyun öncəsi mətbuat konfransında fikirlərini bölüşüb.

90deqiqe.Az-ın məlumatına görə, argentinalı hücumçu Madrid təmsilçisinin güclü heyətə malik olduğunu bildirib.

“Bizi çox güclü komanda ilə oyun gözləyir. Onların heyətində yüksək səviyyəli futbolçular çoxdur. Lakin bizim də güclü tərəflərimiz və hər il yüksək səviyyədə olduqlarını sübut edən oyunçularımız var. Ən vacibi ən yaxşı oyunumuzu göstərməkdir. Kiminlə qarşılaşacağımızı bilirik”, – deyə Lautaro bildirib.

“İnter”in kapitanı qarşılaşmaya hazırlıq üçün vaxtın az olmasına baxmayaraq, komandanın yaxşı hazırlıq keçdiyini vurğulayıb.

“Vaxtımız az olsa da, bu matça yaxşı hazırlaşmışıq. Dünyanın ən yaxşı hücumçularından biri olan Mbappeyə qarşı mübarizəyə də hazırıq”, – deyə argentinalı forvard qeyd edib.

Qeyd edək ki, “Real Madrid” – “İnter” qarşılaşması sentyabrın 8-də keçiriləcək. Görüş Bakı vaxtı ilə saat 23:00-da başlayacaq.