Lautaro Martines “İnter”in Çempionlar Liqasındakı hədəfini açıqladı

“İnter”in hücumçusu və kapitanı Lautaro Martines komandanın UEFA Çempionlar Liqasındakı əsas hədəfindən danışıb.

90deqiqe.Az-ın məlumatına görə, Argentina millisinin üzvü “neradzurri”nin turnirin qalibi olmağı qarşısına məqsəd qoyduğunu bildirib.

“Çempionlar Liqasını qazanmaq? Bu, bizim məqsədimizdir. Hamımızın arzuları var, lakin bu, sadəcə, bir vəsvəsədən daha böyük bir hədəfdir. Sakitliyimizi qorumalıyıq. Bilirik ki, turnirdə çox güclü komandalar mübarizə aparır. Amma bu, şübhəsiz ki, bizim məqsədimizdir.

Buraya ilk gəldiyim gündən deyirəm ki, “İnter”ə mümkün qədər çox titul qazandırmaq üçün çalışmalıyıq”, – deyə Martines jurnalistlərə açıqlamasında bildirib.

Qeyd edək ki, “İnter” tarixində üç dəfə Avropa Çempionlar Kubokunun qalibi olub. Milan təmsilçisi 1964, 1965 və 2010-cu illərdə turnirdə çempionluq yaşayıb.