“Aston Villa” Çempionlar Liqasına qələbə ilə başladı

UEFA Çempionlar Liqasının 2026/2027 mövsümünün əsas mərhələsinin ilk turunda “Brügge” (Belçika) və “Aston Villa” (İngiltərə) komandaları üz-üzə gəlib.

90deqiqe.Az-ın məlumatına görə, Brügge şəhərindəki “Yan Breydel” stadionunda keçirilən qarşılaşma qonaqların 3:2 hesablı qələbəsi ilə başa çatıb. Görüşü baş hakim Sandro Şerer (İsveçrə) idarə edib.

Matçda hesabı 11-ci dəqiqədə “Aston Villa”nın kapitanı Con Makqinn açıb. Lakin 19-cu dəqiqədə Uqo Vetlesen fərqlənərək tarazlığı bərpa edib.

“Villanlar” 22-ci dəqiqədə Emiliano Buendianın qolu ilə yenidən önə keçiblər. İlk hissənin sonuna yaxın, 43-cü dəqiqədə Nikolas Cekson fərqi iki topa çatdırıb.

“Brügge” ikinci hissədə hesabı azaltmağa nail olub. Belçika təmsilçisinin futbolçusu Nikolo Trezoldi 61-ci dəqiqədə penaltini dəqiq yerinə yetirib. Qarşılaşmanın qalan bölümündə başqa qol vurulmayıb və “Aston Villa” 3:2 hesablı qələbə qazanıb.

Növbəti turda “Brügge” oktyabrın 13-də səfərdə İtaliyanın “İnter” klubunun qonağı olacaq. “Aston Villa” isə oktyabrın 14-də doğma meydanda Türkiyənin “Fənərbağça” komandasını qəbul edəcək.

Qeyd edək ki, Çempionlar Liqasının hazırkı qalibi Fransanın PSJ klubudur. Ötən mövsümün finalında Luis Enrikenin rəhbərlik etdiyi Paris təmsilçisi “Arsenal”ı əsas vaxtda 1:1 hesablı heç-heçə ilə başa çatan matçda penaltilər seriyasında 4:3 hesabı ilə məğlub edib.

2026/2027 mövsümünün Çempionlar Liqası finalı iyunun 5-də İspaniyanın paytaxtı Madriddə yerləşən “Metropolitano” stadionunda keçiriləcək.