Halanddan Çempionlar Liqasında unikal göstərici

“Mançester Siti”nin hücumçusu Erlinq Haland UEFA Çempionlar Liqasında növbəti dəfə fərqlənərək diqqətçəkən statistik göstəriciyə imza atıb.

90deqiqe.Az-ın məlumatına görə, norveçli futbolçu turnirin Liqa mərhələsinin IV turunda “Leypsiq”lə keçirilən qarşılaşmanın 78-ci dəqiqəsində qol vuraraq komandasına 3:2 hesablı qələbə qazandırıb.

26 yaşlı hücumçunun Çempionlar Liqasındakı göstəricisi olduqca təsiredicidir. O, turnirdə keçirdiyi 61 oyunda 62-ci qolunu vurub. Haland “Leypsiq”lə qarşılaşmalarda da xüsusilə məhsuldardır. Norveçli futbolçu bu rəqibə qarşı 9 oyunda 13 dəfə fərqlənib.

Qeyd edək ki, Haland Çempionlar Liqasının bütün dövrlər üzrə ən yaxşı 50 bombardiri arasında hər oyuna orta hesabla birdən çox qol vuran yeganə futbolçudur. Onu ümumi qol sayına görə qabaqlayan altı oyunçunun hər biri turnirdə 100-dən çox matç keçirib.