Futbol üzrə Portuqaliya yığmasının hücumçusu Kriştiano Ronaldo millinin düşərgəsindən ayrılıb. Corner.az xəbər verir ki, bu barədə Portuqaliya Futbol Federasiyasının rəsmi saytı məlumat yayıb.
Xəbərdə bildirilir ki, DÇ-2022-nin seçmə mərhələsi çərçivəsində İrlandiya ilə oyunda (2:1) sarı vərəqə aldığı üçün cəzalı duruma düşən Ronaldonun yığmanın düşərgəsində qalmasına ehtiyac duyulmayıb. Bu səbəbdən də 36 yaşlı futbolçu yenicə transfer olunduğu “Mançester Yunayted”in düşərgəsinə qayıdıb.
Qeyd edək ki, Portuqaliya yığması DÇ-2022-nin seçmə mərhələsi çərçivəsində növbəti matçını Bakıda Azərbaycan millisinə qarşı keçirəcək.