Neymar milli karyerasını başa vurur

Fransanın PSJ klubunun futbolçusu Neymar Braziliya yığmasındakı karyerasını 2022-ci il dünya çempionatından sonra başa vurmaq istəyir.

Corner.az-ın məlumatına görə, 29 yaşlı hücumçu DAZN nəşrinə müsahibəsində DÇ-2022-nin yığma karyerasında sonuncu mundial olacağını etiraf edib.

Neymar, futbola davam etməyə güc və ruhunun çatacağını bilmədiyini söyləyib: "Qarşıdakı dünya çempionatında yaxşı çıxış etmək və yığma ilə qalib olaraq, uşaqlıq arzumu gerçəkləşdirmək üçün hər şeyi edəcəyəm. Ümidvaram ki, bizdə hər şey alınacaq".

Qeyd edək ki, Neymar Braziliya millisində 2010-cu ildən çıxış edir. O, 2016-cı ildə olimpiya çempionu, 2013-cü ildə Konfederasiyalar Kubokunun qalibi olub.

Əlavə edək ki, dünya çempionatı gələn il 21 noyabr - 18 dekabrda keçiriləcək.