Ronaldo het-trik sayında rekorda imza atdı

Portuqaliya millisinin futbolçusu Kriştiano Ronaldo yeni rekorda imza atıb.

Corner.az xəbər verir ki, 36 yaşlı hücumçu buna Lüksemburqu 5:0 hesabı ilə məğlub etdikləri 2022-ci il dünya çempionatının seçmə oyununda het-trik edərək nail olub.

Bununla da, Ronaldo yığmada 10-cu het-trikini rəsmiləşdirib. Daha əvvəl hansısa futbolçu bu uğura imza ata bilməyib.

Millidəki qollarının sayını 115-ə çatdıran Kriştiano özünə məxsus bombardirlik rekordunu da yeniləyib.

Qeyd edək ki, əsas rəqibindən bir oyun az keçirən Portuqaliya 16 xalla A qrupunda ikinci pillədə qərarlaşıb. Serbiya seçməsi 17 xalla liderdir.