Afrika Millətlər Kubokunda 1/8 final mərhələsinin oyunları keçirilir. Corner.az xəbər verir ki, bu gün daha iki qarşılaşma baş tutub.
Əvvəlcə Seneqal yığması Kabo Verde ilə üz-üzə gəlib. “Qarabağ”ın yarımmüdafiəçisi Patrik Andradenin də oynadığı matç komandası üçün uğursuz başa çatıb. Belə ki, start heyətdə meydana çıxan 28 yaşlı futbolçu, 21-ci dəqiqədə qırmızı vərəqə alaraq meydandan qovulub. 57-ci dəqiqədə Andradenin komanda yoldaşı Vizinya da oxşar aqibətlə üzləşib. Bununla da rəqibin 9 nəfərlə qalmasından maksimum yararlanan Seneqal yığması 2 cavabsız qolla qalib gələrək 1/4 finala yüksəlib.
Günün digər matçı Mərakeş yığması Malavi ilə üz-üzə gəlib. Üç qolun qeydə alındığı bu oyunda da Mərakeş millisi 1/4 finala yüksələn tərəf olub.
Xatırladaq ki, daha öncə Burkina Faso, Tunis, Qambiya və Kamerun yığmaları 1/4 finala vəsiqəni təmin etmişdi.
Afrika Millətlər Kuboku
1/8 final
25 yanvar
Seneqal – Kabo Verde 2:0
Qol: Mane, 63. Dienq, 90+2.
Mərakeş – Malavi 2:1
Qol: En Nesiri, 45+2. Hakimi, 70 – Mhanqo, 7.
