Daha iki ölkə futbol üzrə dünya çempionatında iştirak hüququ qazanıb. Corner.az xəbər verir ki, CONCACAF zonasında 14-cü turun oyunlarından sonra Meksika və ABŞ yığmaları da mundiala vəsiqəni təmin edib.
Meksika millis El Salvadorla qarşılaşıb. Mexiko şəhərindəki “Astek” stadionunda keçirilən görüşdə meydan sahibləri 2:0 hesablı qələbə qazanıb. Beləliklə, Meksika millisi Qətərdə keçiriləcək dünya çempionatında iştirakı təmin edib. Salvador isə seçimin nəticələrinə görə qrup mərhələsində yeddinci yeri tutub.
Turun digər oyununda Panama millisi evdə Kanada millisini 1:0 hesabı ilə məğlub edib. Kanada yığması daha əvvəl artıq dünya çempionatına vəsiqəni təmin etmişdi. Kanadalılar təsnifat mərhələsinin qrup mərhələsində birinci, Panama isə beşinci yeri tutub.
ABŞ millisi seçmə mərhələnin son oyununda Kosta Rikaya 0:2 hesabı ilə məğlub olub. Bu nəticəyə görə, komandalar eyni xal toplayıb - 25. Lakin ABŞ millisi top fərqinə görə daha öndə qərarlaşıb. Paralel görüşdə Yamayka Hondurasla üz-üzə gəlib. Qarşılaşma meydan sahiblərinin qələbəsi ilə yekunlaşıb - 2:1.
Beləliklə, Şimali Amerikadan Kanadadan sonra Meksika və ABŞ yığmaları mundialda iştirak hüququ əldə edib. Hazırda DÇ-2022-nin 32 iştirakçısından artıq 29-u məlumdur. Bu günə kimi DÇ-2022-də iştirak hüququnu bu komandalar qazanıblar:
Avropa: İngiltərə, Belçika, Almaniya, Danimarka, İspaniya, Niderland, Polşa, Portuqaliya, Serbiya, Fransa, Xorvatiya, İsveçrə
Cənubi Amerika: Argentina, Braziliya, Ekvador, Uruqvay
Afrika: Qana, Mərakeş, Seneqal, Kamerun, Tunis
Asiya: İran, Qətər (təşkilatçı ölkə), Səudiyyə Ərəbistanı, Cənubi Koreya, Yaponiya
Şimali Amerika: Kanada, ABŞ, Meksika
Daha 3 iştirakçı milli komandadan ən sonuncusu iyun ayında müəyyənləşəcək.
DÇ-2022-nin püşkatması aprelin 1-də keçiriləcək. Mundial 21 noyabr-18 dekabrda olacaq.
