Qrizmann DÇ-2022-nin favoritlərini açıqladı

Fransa milli komandasının hücumçusu Antuan Qrizmann bu il Qətərdə keçiriləcək dünya çempionatının favoritlərini açıqlayıb.

Corner.az-ın məlumatına görə, icarə əsasında "Atletiko"da çıxış edən 30 yaşlı futbolçu İspaniya və Fransanı da mundialın qalibi olmağa namizədlər sırasında gördüyünü bildirib. Qrizmann eyni zamanda Braziliya və Argentinanın da iddialı olduğunu bildirib.

Qrizmann DÇ-2022-də hər şeyin çətin olacağını söyləyib: "Bizim yaxşı komandamız var, ardıcıl 9 oyundur uduzmuruq. Bu, yaxşı əlamətdir. Xüsusən ona görə ki, dünya çempionatı zamanı hər şey çətin olur".

Qeyd edək ki, DÇ-2022 21 noyabr - 18 dekabrda keçiriləcək. Son dünya çempionu Fransa D qrupunda Danimarka və Tunislə birlikdə yer alıb. Dördüncü komanda isə Peru, Avstraliya və ya BƏƏ olacaq.