Ekvador millisi DÇ-dan kənarlaşdırılır

Futbol üzrə Ekvador millisi bu il Qətərdə keçiriləcək dünya çempionatından kənarlaşdırılacaq.

Corner.az "Daily Mial" nəşrinə istinadən xəbər verir ki, buna yığmanın futbolçusu Bayron Kastilyonun əslində kolumbiyalı olması və saxta pasportla oynaması səbəb göstərilir.

24 yaşlı hücumameylli yarımmüdafiəçinin Ekvador Futbol Federasiyasının (FEF) müstəntiqləri ilə söhbətinin səsyazısı yayılıb. Sözügedən səsyazmada 1998-ci ildə Ekvadorda deyil, 1995-ci ildə Kolumbiyada anadan olduğunu açıq şəkildə etiraf edilib.

Sentyabrın 15-də FIFA-da növbəti dinləmə keçiriləcək.

Çili Futbol Federasiyasının prezidenti Pablo Milad, Kastilyonun səsyazısı onların mundiala qatılmaq ümidlərini artırdığını bildirib.

Qeyd edək ki, futbolçunun saxta sənədlə oynaması təsdiqini tapsa, Ekvadorun Cənubi Amerika zonası üzrə seçmə mərhələdəki 8 oyununun hamısının nəticəsi ləğv olunacaq.