Futbol üzrə Almaniya millisinin və “Bavariya”nın qapıçısı Manuel Noyer yığma komandadakı gələcək karyerası haqda danışıb. Corner.az “Bild” nəşrinə istinadən xəbər verir ki, 36 yaşlı qolkiper DÇ-2022-nin qalibi olduqları təqdirdə millidəki karyerasını başa vuracağı haqda düşünəcəyini bildirib:
“Güman edirəm ki, bu, mənim üçün sonuncu dünya çempionatı olacaq. Amma kim bilir, bəlkə, bu belə olmaya da bilər. Hər şey baş verənlərdən asılı olacaq. DÇ-2022-nin qalib olsaq, bəlkə, hətta milli ilə vidalaşmaq haqda düşünə bilərəm. Dünya çempionu olmaq istədiyimizi bildirməkdən çəkinmirəm. Amma bilirik ki, çempionluğa çoxlu layiqli iddiaçılar var”.
DÇ-2022 noyabrın 20-də Qətərdə başlayacaq. Almaniya millisi İspaniya, Yaponiya və Kosta-Rika ilə E qrupunda mübarizə aparacaq.