Mundialda ən çox iştirak etmiş baş məşqçilər

Beynəlxalq Futbol Tarixi və Statistikaları Federasiyası (IFFHS) bu il Qətərdə keçiriləcək dünya çempionatı ərəfəsində daha bir mövzu ilə bağlı araşdırma aparıb.

Corner.az-ın məlumatına görə, bu dəfə daha çox mundialda baş məşqçi kimi iştirak etmiş şəxslərin siyahısı açıqlanıb.

Siyahının ilk pilləsində 6 dəfə DÇ final mərhələsi həyəcanı yaşamış braziliyalı Karlos Alberto Parreyra qərarlaşıb. O, əlçatmaz olan bu uğurlu yoluna 1982-ci ildə başlayıb. İspaniyada keçirilmiş mundialda Küveyt millisinə rəhbərlik etmiş 79 yaşlı mütəxəssis İtaliya-1990-da BƏƏ, ABŞ-1994 və Almaniya-2006-da Braziliya, Fransa-1998-də Səudiyyə Ərəbistanı, CAR-2010-da isə meydan sahiblərinin baş məşqçisi olub.

İkinci pillədə Parreyraya ən yaxın nəticə göstərmiş Bora Milutinoviç yer alır. O, 5 dəfə DÇ final mərhələsində iştirak edib. Meksika vətəndaşı olan keçmiş yuqoslaviyalı bunu 5 müxtəlif komanda ilə bacarıb. 78 yaşlı çalışdırıcı 1986-cı ildə Meksikada keçirilmiş mundialdan 2022-ci ildə Yaponiya və Cənubi Koreyada baş tutmuş final mərhələsinə qədər uyğun ardıcıllıqla Meksika, Kosta-Rika, ABŞ, Nigeriya və Çin millilərinə rəhbərlik edib.

Növbəti yerləri 4 fərqli mundialda çalışmış 6 məşqçi tutur. Onlardan 5-i eyni komandaya (öz ölkələri) rəhbərlik edib. Henri Mişel isə əksinə, 4 fərqli komandada fəaliyyət göstərib.

Hazırda İranın baş məşqçisi olan portuqaliyalı Karluş Keyroş Qatar-2022-də 4-cü mundial həyəcanını yaşayacaq.