Qətər millisi tarixində ilk dəfə dünya çempionatında qol vurub. Corner.az xəbər verir ki, sözügedən komanda DÇ-2022-nin qrup mərhələsinin 2-ci turunda Seneqala qarşı matçın (1:3) 78-ci dəqiqəsində qol vurub.
Məhəmməd Muntari baş zərbəsi ilə fərqlənərək yığmanın tarixinə düşüb. Səbəb isə Qətər üçün bu, dünya çempionatı tarixində ilk qoldur. Həmçinin 2022-ci il dünya çempionatı bu komandanın tarixində ilkdir. Qətər turnirin ev sahibi ölkə kimi mundiala vəsiqə qazanıb. Lakin bu komanda ev sahibi olduğu DÇ-2022-də qrupdan çıxmaq şanslarını itirib. Komanda ilk matçında isə Ekvadora da 0:2 hesabıyla uduzmuşdu. Nəticədə Qətər yığmasının Niderlandla sonuncu - 3-cü tur oyununun nəticəsindən asılı olmayaraq, A qrupundan pley-offa yüksələ bilməyəcəyi rəsmiləşib.
A qrupunda Niderland 4 xalla liderdir. Eyni xalı olan Ekvador isə 2-cidir. Seneqal 3 xalla 3-cü pillədə qərarlaşır.
