Qətərdəki dünya çempionatının iştirakçılarından olan Ekvador yığması ciddi itki ilə üzləşib. Corner.az xəbər verir ki, həm sözügedən komandanın, həm də DÇ-2022-nin hazırkı bombardiri Enner Valensiya sıradan çıxıb.
33 yaşlı hücumçu qrup mərhələsinin 2-ci turu çərçivəsində baş tutan Niderlandla görüşdə (1:1) zədələnib. O, oyuna davam edə bilməyib və 90-cı dəqiqədə meydanı xərəkdə tərk edib. Valensiyanı Kevin Rodriqes əvəzləyib. Forvardın durumuna tibbi müayinədən sonra aydınlıq gələcək.
Xatırladaq ki, Enner Valensiya 3 qolla dünya çempionatının bombardirləri siyahısında birinci pillədə qərarlaşıb. O, ilk turda Qətərlə görüşdə (2:0) dubl edib və Niderlandla matçda 1 qol vurub.
