Dortmund “Borussiya”sının yarımmüdafiəçisi Yulian Brandt Almaniya yığmasının Qətərdə keçirilmiş dünya çempionatında üzləşdiyi fiasko ilə bağlı fikirlərini bölüşüb. Corner.az xəbər verir ki, 26 yaşlı oyunçu ölkəsinin mətbuatına açıqlamasında siyasi məsələlərə həddən artıq diqqət yetirdiklərini etiraf edib:
“Siyasət millimizi müşayiət edən nəhəng mövzu idi. Təbii ki, dünya çempionatındakı qeyri-qənaətbəxş çıxışın əsas səbəbi bu deyildi, amma bu mövzu sözsüz ki, öz rolunu oynadı. Çox vaxt belə bir hiss var idi ki, söhbət idmandan yox, siyasətdən və başqa mövzulardan gedir. Biz Qətərə uğurlu turnir keçirmək üçün getmişdik, yad ölkəni Avropa zövqünə dəyişmək üçün yox. Fikrimcə, biz Qətəri ev sahibi kimi qəbul etsəydik, daha yaxşı olardı”.
