“Ronaldoya verilən şərti cəza qəbulolunmazdır”

FİFA-nın sabiq prezidenti Yozef Blatter qurumun Portuqaliya yığmasının kapitanı Kriştiano Ronaldoya tətbiq etdiyi şərti diskvalifikasiya qərarından narazılığını bildirib.

90deqiqe.Az-ın "The Telegraph"a istinadən məlumatına görə, Blatter qərarı kəskin tənqid edib:

“Bu, qəbul edilə biləcək prinsip deyil. İntizam məsələləri məhkəmə tərəfindən araşdırılmalıdır. FİFA prezidentinin iradəsinə uyğun qərar vermək düzgün deyil. Ronaldoya tətbiq olunan cəzanın yüngülləşdirilməsi FİFA kodeksinə əsaslanıb? Mən bunu hər dəfə səhv adlandırmaq məcburiyyətində deyiləm — çünki bir çoxları bunun səhv olduğunu onsuz da bilir”

Xatırladaq ki, Portuqaliya millisinin kapitanı İrlandiya ilə görüşdə (0:2) qırmızı vərəqə almış və FİFA üç oyunluq cəza vermişdi. Lakin cəzanın iki hissəsi şərti sayıldığından Ronaldo dünya çempionatının qrup mərhələsinin ilk matçında oynaya biləcək. Ulduz futbolçu artıq Ermənistanla qarşılaşmanı (9:1) buraxaraq cəzanı çəkib.