Ançelottinin illik qazancı 40 milyon avroya çata bilər

Braziliya Futbol Konfederasiyası İtaliyalı mütəxəssis Karlo Ançelotti ilə yeni – dördillik müqavilə bağlamağı planlaşdırır.

90deqiqe.Az-ın "AS"a  istinadən məlumatına görə, yeni razılaşmaya əsasən, Ançelottinin illik məvacibi təxminən 40 milyon avro təşkil edəcək. Bu halda o, milli komandalar səviyyəsində dünyanın ən yüksəködənişli baş məşqçisi ola bilər.

Hazırkı müqavilədə əlavə olaraq bonus maddəsi də yer alıb. Belə ki, Braziliya yığması 2026-cı ildə keçiriləcək dünya çempionatının qalibi olacağı təqdirdə, italiyalı mütəxəssis 5 milyon avro mükafat əldə edəcək.

Qeyd edək ki, Karlo Ançelotti 2025-ci ilin may ayından Braziliya millisinə rəhbərlik edir. O, bu müddətdə komanda ilə səkkiz oyuna çıxıb – dörd qələbə qazanıb, iki heç-heçə edib və iki məğlubiyyətlə üzləşib.

Təcrübəli çalışdırıcı karyerası ərzində "Milan", "Real Madrid", "Yuventus", PSJ, "Bavariya", "Everton" və "Napoli" komandaları çalışdırıb.